რუსეთის საგარეო საქმეთა მინისტრის მოადგილის სერგეი რიაბკოვის განცხადებით, უკრაინის ირგვლივ შექმნილი სიტუაციიდან ამერიკის შეერთებული შტატები დიდძალ ფულს შოულობს. ამის შესახებ რიაბკოვმა Rossiya 24-ის ეთერში განაცხადა.
რიაბკოვის თქმით, ვაშინგტონის ქმედებები მიმართულია იმისკენ, რომ კიევსა და მოსკოვს შორის მოლაპარაკებების პერსპექტივა არ შედგეს.
"ის, რაც ხდება უკრაინაში და მის ირგვლივ, მხოლოდ საბაბია მადის აღსაძვრელად, ზოგადად ამერიკელები მიმდინარე კრიზისის ფონზე დიდ ფულს შოულობენ", - აცხადებს რუსი დიპლომატი.
რიაბკოვის თქმით, ვაშინგტონის განცხადებები საგანგაშოა და ისინი კიევის რეჟიმს ესკალაციისკენ უბიძგებენ.
ლავროვის მოადგილემ ასევე თქვა, რომ სწორედ ვაშინგტონისა და ლონდონის დავალებით ჩაიშალა რუსეთ-უკრაინის მოლაპარაკებები.
ამასთან, რიაბკოვის განცხადებით, "სპეციალური სამხედრო ოპერაციის" მიზნები ნებისმიერ შემთხვევაში ბოლომდე იქნება მიყვანილი.
